ინსტრუქცია რეფერატისთვის
წინამდებარე ტექსტი საორიენტაციო ხასიათს ატარებს. პირველ რიგში, კარგად მოისმინეთ და ჩაინიშნეთ, რას გეტყვით ქ-ნი მარინა!
შინაარსობრივი მხარე:
პირველ რიგში, გადადით ამ ბმულზე და თქვენი სახელის და გვარის გასწვრივ მიუთითეთ რეფერატის სახელწოდება.
რეფერატისთვის შეგიძლიათ, აირჩიოთ საქართველოს შემადგენლობაში არსებული ნებისმიერი ტერიტორიული ერთეული: მხარე, ქალაქი, მუნიციპალიტეტი, სოფელი. ტექსტის მეშვეობით, უნდა წარმოადგინოთ ამ არეალის საზოგადოებრივ-გეოგრაფიული დახასიათება. უნდა აღწეროთ და გააანალიზოთ შემდეგი კომპონენტები:
- ზოგადი აღწერა:
- ფიზიკურ-გეოგრაფიული და პოლიტიკურ-გეოგრაფიული მდებარეობა;
- ადმინისტრაციული კუთვნილება;
- ფართობი და მოსახლეობა;
- საზღვრები და მოსაზღვრე ტერიტორიული ერთეულები
- ფიზიკურ-გეოგრაფიული თავისებურებები, მათ შორის:
- რელიეფი;
- შიდა წყლები;
- მინერალური რესურსები (წყლები არ იგულისხმება!!!);
- კლიმატი;
- ნიადაგები და გეოლოგია
- მოკლე ისტორიული ექსკურსი
- როგორ ჩამოყალიბდა ეს ტერიტორიული ერთეული. მაგალითად, თუ მუნიციპალიტეტს იღებთ, რომელი სხვა მუნიციპალიტეტის ან ადრე არსებული ტერიტორიული ერთეულის ფარგლებიდან გამოიყო? თუ ქალაქია, როდის მიიღო ურბანული სტატუსი და ა.შ.
- ისტორიული განვითარების ძირითადი თავისებურებები
- მოსახლეობა
- მეურნეობა
- მეურნეობის ისტორიულად ჩამოყალიბებული დარგობრივი სტრუქტურა;
- მრეწველობა;
- სოფლის მეურნეობა;
- ტრანსპორტი და კომუნიკაციები;
- ენერგეტიკა;
- ძირითადი საწარმოები და დამსაქმებლები
- (თუ მუნიციპალიტეტებზე წერთ:) საჯარო ფინანსები - როგორია პროგრამული ბიუჯეტი და რაში იხარჯება თანხების ძირითადი ნაწილი?
- განვითარების პერსპექტივების თქვენეული შეფასება
- სამეურნეო პერსპექტივები;
- კერძოდ: ტურისტულ-სარეკრეაციო პერსპექტივები;
თუკი თემა დარგობრივი ხასიათისაა (მაგ. დემოგრაფია, მეურნეობის რომელიმე დარგის დახასიათება), მაშინ შემდეგი სტრუქტურით იხელმძღვანელეთ:
- შესავალი
- დარგის ან ფენომენის მოკლე მიმოხილვა და მისი მნიშვნელობა;
- კვლევითი კითხვები, ანუ კონკრეტულად რის შესწავლას აპირებთ ამ ნაშრომის ფარგლებში.
- ისტორიულ-გეოგრაფიული ექსკურსი
- დარგის ჩამოყალიბების ისტორია ან
- ამა თუ იმ ფენომენის ჩამოყალიბების ისტორია (მაგ. თუ წერთ ტრანსპორტზე, აღწერეთ, თუ როდის და როგორ გაჩნდა სარკინიგზო, მილსადენი, საავტომობილო და ა.შ. ტრანსპორტი, როგორ ვითარდებოდა და ა.შ.)
- ამჟამინდელი სიტუაცია
- სადღეისოდ როგორი მდგომარეობაა;
- რა არის ძირითადი პრობლემატური საკითხები;
- რა იწვევს ამ პრობლემატურ მდგომარეობას;
- სამომავლო პერსპექტივები
- როგორია განვითარების პერსპექტივები
ვიმეორებ, ეს საკმაოდ ზოგადი სტრუქტურაა, ასე რომ მივესალმები, თუკი საკუთარ გეგმას გამოიყენებთ. თუ დაგჭირდათ, აუცილებლად მომმართეთ კითხვებით.
გაფორმება და ჩაბარება:
ნაშრომში აუცილებელია ცხრილების, დიაგრამების და რუკების გამოყენება. თუმცა გაფორმებისას უზარმაზარი გრაფიკი ან დიაგრამა ერთ გვერდად არ ჩაითვლება. აუცილებელია, რომ გამოყენებული ვიზუალური თუ რაოდენობრივი მასალა ტექსტს უკავშირდებოდეს.
შეძლებისდაგვარად დაიცავით გრამატიკის და წერის წესები. სახელმძღვანელოდ შეგიძლიათ, გამოიყენოთ ენის მოდელირების ასოციაციის მიერ შექმნილი ელექტრონული ცნობარი.
გამოყენებული მასალები ციტირება აუცილებელია! დაიცავით APA ფორმატი, რომლის საკმაოდ კარგი ქართულენოვანი ტექსტი ამ ბმულზეა მოცემული. ვებსაიტებიდან აღებული მასალის ციტირებისას აუცილებელია სრული ბმულის მითითება. მაგალითად:
- შეცდომაა: მოსახლეობის 2014 წლის საყოველთაო აღწერის ძირითადი შედეგები ზოგადი ინფორმაცია. www.census.ge
- სწორია: მოსახლეობის 2014 წლის საყოველთაო აღწერის ძირითადი შედეგები ზოგადი ინფორმაცია. ნანახია: http://census.ge/files/results/Census%20Release_GEO.pdf
რეფერატის შაბლონი ჩამოტვირთეთ ამ ბმულიდან. როგორც ხედავთ, თქვენი ტექსტი უნდა იყოს Microsoft Word-ის დოკუმენტის მაქსიმუმ ათი გვერდი (სატიტულო ფურცლის და შინაარსის გამოკლებით). ტექსტი უნდა ააწყოთ 11 ზომის Sylfaen შრიფტით და დაიცვათ სტრიქონებს შორის 1.5 დაშორება.
ფაილს დაარქვით თქვენი სახელი და გვარი (მაგ. დავით_სიჭინავა_ესე.docx) და ათი მაისის საღამოს 23:59-მდე ატვირთეთ ამ ბმულზე. დაგვიანებით ატვირთული ნაშრომები უფრო მკაცრად გასწორდება :)
გაითვალისწინეთ, პლაგიატი, წყაროს ციტირების გარეშე გამოყენება ან - რეფერატის სხვისთვის დაწერინება დასჯადია და შედეგად ავტომატურად ნულ ქულას მიიღებთ.
წარმატებებს გისურვებთ!